Thursday 25 February 2021

Mae Fforwm Rhyngwladol Cenhedlaeth IV (GIF) wedi cyhoeddi’r rhifyn diweddaraf o’i gylchlythyr misol sy’n cynnwys cyfraniadau sylweddol gan staff LNC.

Gyda’n Prif Swyddog Gwyddoniaeth a Thechnoleg, Dr Fiona Rayment yn olygydd gwadd, mae’r cylchlythyr rhyngwladol yn cynnwys cyfraniadau arbennig gan dri gwyddonydd LNC arall: Dr Nicholas Barron, Arweinydd Technegol ar gyfer Tanwydd Adweithyddion Cyflym, Caroline Longman, Cyfarwyddwr Cyfrif Llywodraeth y DU, a Dr Dave Goddard, Cymrawd mewn Gweithgynhyrchu Tanwydd.

Wedi’i greu yn 2001, mae’r Fforwm Rhyngwladol Cenhedlaeth IV yn dwyn ynghyd 13 gwlad i gydlynu ymchwil a datblygu systemau niwclear datblygedig y bedwaredd genhedlaeth. I sicrhau y gall aelodau gael y wybodaeth ddiweddaraf am gynnydd y fforwm, ac am unrhyw ddatblygiadau hynod yn y maes, cyhoeddir cylchlythyr digidol misol er budd y rhai sy’n ymwneud â’r sector neu sydd â diddordeb ynddo.

Yn rhifyn y mis hwn, mae erthyglau yn trafod y rôl y gall ac y dylai niwclear datblygedig ei chwarae yn y Papur Gwyn Ynni a gyhoeddwyd yn ddiweddar gan y llywodraeth ac yn economi Hydrogen y DU.

Dywedodd Dr Fiona Rayment, Prif Swyddog Gwyddoniaeth a Thechnoleg y LNC:

“Yr oedd yn fraint derbyn y gwahoddiad i fod yn olygydd gwadd cylchlythyr y Fforwm Rhyngwladol Cenhedlaeth IV y mis hwn. Dwi’n gobeithio fod y rhifyn yn rhoi mwy o fewnwelediad i ddarllenwyr o’r sgyrsiau sydd i’w cael ynghylch niwclear yn y DU a sut rydyn ni’n gweithio tuag at chwyldro diwydiannol gwyrdd. Mae hwn yn sicr yn amser allweddol ar gyfer datblygu ynni niwclear ledled y byd ac rwy’n falch o gyfrannu at waith y Fforwm wrth sicrhau y gall technoleg niwclear ddatblygedig gynorthwyo i gyflawni ein hymrwymiadau sero net.”